October 14, 2019
ᓰᐱᓰᒃᑯᑦ ᐊᔾᔨᒌᖏᑦᑐᓂᒃ ᐅᓂᒃᑳᓕᐅᕐᑎᑦᓯᕙᓪᓕᐊᓯᒪᔪᑦ ᐃᓕᑕᕆᔭᐅᓯᒪᖁᓪᓗᒋᑦ ᓄᓇᓕᕐᔪᐊᖑᖃᑎᒌᑦ ᑲᑐᔾᔨᖃᑎᒌᖓᑦ ᐃᓕᑕᖅᓯᓂᖃᓚᐅᖅᑎᓪᓗᒋᑦ ᐅᑭᐅᖅ 2019 ᐅᑭᐅᕆᔭᐅᖁᓪᓗᒍ ᐃᓕᑕᕆᔭᐅᓯᒪᓗᑎᒃ ᓯᓚᕐᔪᐊᓕᒫᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ.
ᐅᔾᔨᕈᓲᑕᐅᕙᓪᓕᐊᒋᐊᖃᕐᓯᒪᔪᖅ ᐅᖃᐅᓯᑐᖃᕆᔭᐅᓯᒪᔪᑦ ᐊᓯᐅᕙᓪᓕᐊᓯᒪᓂᖏᓐᓄᑦ, ᓴᖅᑭᑎᑦᓯᒍᒪᓪᓗᑎᓪᓗ ᐅᖃᐅᓰᑦ, ᐱᕙᓪᓕᐊᓃᑦ ᐋᖅᑭᐅᒪᖃᑎᒌᑦᓯᐊᕐᓂᕐᓗ ᐊᑐᓕᖅᑎᑕᐅᕚᓪᓕᖁᓪᓗᒍ. ᓯᐅᓪᒪ ᐃᐊᑯᓪᔅ, ᓰᐱᓰᒃᑯᓐᓂ ᐱᕙᓪᓕᐊᔪᓕᕆᔨᐅᔪᖅ ᑲᖏᖅᖠᓂᕐᒥ, ᓄᓇᕗᒥ, ᖃᐅᑕᒫᑦ ᐅᖃᓪᓚᒃᐸᒃᑐᖅ ᐅᓐᓄᓴᒃᑯᑦ ᐊᓈᓇᒥᓂᒃ ᐱᔾᔪᔾᔨᓪᓗᓂ.
“ᐊᓈᓇᖃᕋᒪ ᐃᓐᓇᒻᒪᕆᐅᓕᖅᑐᒥᒃ ᐃᓐᓇᒃᑯᕕᒻᒦᓕᕐᑐᒥᒃ ᐊᕐᕕᐊᓂ ᓈᓚᐃᓐᓇᓲᖑᓪᓗᓂ ᓈᓚᐅᑎᓂᒃ ᐅᓪᓛᖓᓂᑦ ᓯᓂᓐᓂᐊᓕᕋᐃᒐᒥ ᑭᓯᐊᓂ ᓈᓚᒍᓐᓃᓲᖑᓪᓗᓂ. ᓲᕐᓗ ᓯᓚᕐᔪᐊᕆᔭᖓ ᒥᑭᓐᓂᖅᓴᐅᓕᕐᒪᑦ (ᑕᐃᑦᓱᒪᓂᓂᑦ) ᑭᓯᐊᓂ ᓈᓚᐅᑏᑦ ᑐᓐᖓᕕᒋᒻᒪᕆᒃᑕᖏᑦ ᖃᐅᔨᒪᔾᔪᑎᒋᓪᓗᒋᑦ ᐱᕙᓪᓕᐊᔪᓂᒃ ᐊᕙᑎᐊᓂ,” ᐃᐊᑯᓪᔅ ᑕᐃᒫᒃ ᐅᖃᕐᑐᖅ.
ᐃᐊᑯᓪᔅ 53−ᓂᒃ ᐅᑭᐅᖃᓕᕐᑐᖅ, ᐱᕙᓪᓕᐊᔪᓕᕆᕙᒃᑐᖅ, ᐅᖃᖅᑎᒋᔭᐅᓪᓗᓂ ᓴᖅᑭᑎᑦᓯᖃᑦᑕᕐᓱᓂᓗ ᑐᓵᔭᒃᓴᓂᑦ ᐱᓕᕆᖃᑎᖃᕐᓱᓂ ᕌᐸᑦ ᑲᕝᕖᑦᑐᕐᒥᒃ. ᐃᑲᕐᕌᓐᓄᑦ ᒪᕐᕉᓐᓄᑦ ᓈᓚᐅᓯᕆᕙᒃᑐᑦ ᑭᕙᓪᓕᕐᒥ ᓄᓇᕗᑦ ᐃᓗᐊᓂ. ᐃᑲᕐᕋᒥᑦ ᓇᑉᐸᖓᓂᓪᓗ ᐃᓄᒃᑎᑑᖅᑐᓂᒃ ᑐᓴᖅᓴᐅᑎᑦᓯᕙᒃᑐᑦ ᐃᑲᕐᕋᐅᑉ ᓇᑉᐸᖓ ᑭᖑᓪᓕᐅᓪᓗᓂ ᖃᓪᓗᓈᑎᑑᖅᑎᓪᓗᒍ.
ᑐᓴᕐᕕᖃᖃᑦᑕᖅᑐᒍᑦ ᓄᓇᓕᓐᓂᑦ ᐅᐸᓚᐅᖅᓯᒪᓐᖏᑕᒃᑲᓂᒃ.
ᐊᓈᓇᒥᓂᒃ ᐃᓱᒪᒋᔭᖃᐃᓐᓇᖅᐸᒃᑐᖅ, ᐃᐊᑯᓪᔅ ᑕᐅᑐᕐᕉᕋᐅᔭᖅᐸᒃᑲᒥ ᐊᓈᓇᖓᑕ ᓈᓚᒻᒪᒍ ᐃᓛᓐᓂᒃᑯᑦ ᖃᕿᐊᖅᓯᔨᒋᕙᓚᐅᕋᒥᐅᒃ ᑭᓯᐊᓂ ᑕᐃᒪᐃᓗᐊᕈᓐᓇᐃᓪᓕᒻᒪᑦ ᐅᖃᐅᔾᔨᔨᒋᕙᓚᐅᖅᑕᖓ.
ᑕᐃᑦᓱᒪᓂᒃᑲᓐᓂᖅ, ᐅᖃᑦᓯᐊᕐᓂᓐᖏᒃᑯᒪ ᐃᓄᒃᑎᑐᑦ ᑕᐃᒫᑦᓯᐊᖑᖏᑦᑐᕐᓘᓐᓃᑦ ᐅᖃᕐᓂᕈᒪ ᐊᖏᕐᕋᑐᐊᕋᒪ ᐅᖃᓗᕝᕕᒋᕙᓚᐅᖅᑖᖓ.” ᒫᓐᓇᓕ, ᐃᐊᑯᓪᔅ ᐅᖃᐅᔾᔪᐃᔨᖃᕐᓂᖅᓴᐅᖃᑦᑕᓕᕐᑐᖅ ᐊᖓᔪᒥᓂᒃ ᓇᓕ ᑯᓱᒐᕐᒥᒃ, ᑲᒥᓯᓇᕆᔭᐅᔪᖅ ᓄᓇᕗᒧᑦ.
ᐅᖃᐅᓯᕐᒥᒃ ᖃᓂᒌᓕᖅᑎᑦᓯᕙᓪᓕᐊᓂᖅ
ᐃᐊᑯᓪᔅ ᐃᓱᒪᒃᓴᖅᓯᐅᕈᑎᖃᐃᓐᓇᐅᔭᖅᐸᒃᑐᖅ ᓈᓚᒃᑎᒥᓂᒃ, ᓈᓚᓗᐊᖅᐸᒃᑐᓂᒃ ᐃᓄᒃᑎᑐᐃᓐᓇᖅ ᑐᑭᓯᐊᔪᓂᒃ ᐅᖃᓪᓚᒍᓐᓇᕐᑐᓂᓪᓗ ᐱᓗᐊᖅᑐᒥᒃ ᐃᓐᓇᐅᓂᖅᓴᓂᒃ, ᐊᒻᒪᓗ ᒪᒃᑯᓐᓂᖅᓴᓂᒃ, ᐃᓄᒃᑎᑑᓗᐊᕈᓐᓇᖏᓐᓂᖅᓴᐅᓕᕐᑐᓂᒃ.
ᐊᖅᑯᑎᒋᔭᐅᔫᔮᕐᓂᕋᕐᑐᖅ ᑭᖑᕚᖑᖃᑎᒌᓄᑦ ᑕᐃᒪᓐᓇᓗ ᐋᖅᑭᒃᓯᓯᒪᕙᒃᑐᖅ ᓈᓚᐅᑎᒃᑰᖅᑎᓐᓂᐊᕐᑕᒥᓂᒃ. “ᐊᒥᓲᒻᒪᑕ ᓱᓕ ᐃᓄᒃᑎᑐᐃᓐᓇᖅ ᐅᖃᓪᓚᒃᑐᑦ ᐃᓐᓇᐃᑦ. ᐅᖃᕐᕕᖃᕈᒪᕙᒃᑑᒐᓗᐊᑦ ᒪᒃᑯᒃᑐᓂᒃ ᑭᓯᐊᓂ ᐊᔪᕈᑎᖃᓕᕐᒪᑕ.
ᑕᐃᒪᓐᓇᒧᑦ ᐊᖅᑯᑎᒋᔭᐅᔫᔮᕐᑐᖓ ᒪᒃᑯᒃᑐᓄᑦ ᐃᓐᓇᕐᓄᓪᓗ.” ᐃᓄᒃᑎᑐᑦ ᓈᓚᐅᓯᕆᓕᕋᐃᒐᒥ ᑕᐅᑐᖅᑰᖅᐸᒃᑐᖅ ᐃᓐᓇᐅᓂᕐᓴᓂᒃ ᓈᓚᒃᑐᓂᒃ, ᐃᓕᖅᑯᓯᑐᖃᐅᓚᐅᕐᑐᓂᒃ ᐱᔾᔪᓯᐅᓚᐅᖅᑐᓂᓪᓗ ᑐᑭᓯᑎᒐᓱᒃᐸᖏᑦᑐᖅ ᖃᐅᔨᒪᔪᑐᖃᐅᒻᒪᑕ, ᑭᓯᐊᓂᓕ ᑐᑭᓯᑎᒐᓱᒋᐊᖃᖅᑐᒃᓴᐅᕙᒃᑕᖏᑦ ᐅᓪᓗᒥᐅᓕᖅᑐᖅ ᐊᑐᖅᑕᐅᓕᕐᑐᑦ ᒥᒃᓵᓄᑦ ᓲᕐᓗ ᐅᖃᓘᑎᐊᓛᒃᑯᑦ ᐱᓕᕆᔾᔪᑎᓂᒃ.
ᖃᓪᓗᓈᑎᑐᑦ ᓈᓚᐅᓯᕆᓕᕋᐃᒐᒥ ᒪᒃᑯᒃᑐᓄᑦ ᓈᓚᒃᑕᐅᓂᕐᓴᐅᓪᓗᓂ, ᐃᓄᒃᑎᑐᑦ ᐊᐱᖅᓲᑎᕕᓂᕐᓂᒃ ᓇᐃᓈᕆᓪᓗᓂ ᑐᑭᓯᑎᑦᓯᒋᐊᖅᐸᒃᑐᖅ ᒪᒃᑯᒃᑐᓂᒃ. “ᐱᓕᕆᐊᒃᓴᕆᒐᒃᑯ ᓲᕐᓗ ᐳᓛᕐᓂᖃᖅᑑᔮᕐᓗᖓ ᖃᐅᑕᒫᑦ ᐃᓄᓐᓂᒃ ᐊᖏᕐᕋᖏᓐᓂ,” ᐃᐊᑯᓪᔅ ᐅᖃᕐᑐᖅ. ᖁᔭᒋᔭᖃᖅᐸᒃᑐᖅ ᓈᓚᒃᑎᒥᓄᑦ ᓈᓚᒃᑕᐅᕙᒃᑲᒥ ᑕᐃᒪᓐᓇᒧᑦ ᑐᓐᖓᓇᕋᓱᐊᖅᐸᒃᑐᖅ ᖃᓄᓕᒫᖅ.
ᑐᓴᖅᓴᐅᑎᑦᓯᒐᓱᐊᕐᐸᒃᑐᖅ ᓰᐱᓰᒃᑯᑦ ᓂᐱᓕᐅᖅᑕᐅᓯᒪᔪᕕᓂᕐᓂᒃ ᐃᓕᖅᑯᓯᑐᖃᐅᓚᐅᕐᑐᑦ ᒥᒃᓵᓄᑦ, ᐅᑭᐅᒐᓴᓄᑦ ᐃᓄᒃᑎᑐᑦ ᐊᐱᖅᑯᑕᐅᖃᑦᑕᕐᓯᒪᔪᓂᒃ ᐅᓂᒃᑳᖅᑐᐊᓂᓪᓗ.
ᒫᓐᓇᓵᖅ ᑐᓴᖅᓴᐅᑎᑦᓯᓚᐅᕐᒥᔪᖅ ᐃᓐᓇᒻᒪᕆᒻᒥᒃ ᑕᓗᕐᔪᐊᕐᒥᐅᑕᒥᒃ ᐅᓂᒃᑳᖃᖅᑎᓪᓗᒍ ᓄᑕᖅᑭᕆᓂᐅᑉ ᒥᒃᓵᓄᑦ.
ᓈᓚᐅᓯᕆᓂᕐᒥᑦ ᐱᔪᒪᔭᖃᐃᓐᓇᓯᒪᔪᖅ
ᐱᖅᑯᓯᑐᖃᐅᓚᐅᕐᑐᓂᒃ ᓈᓚᒃᑕᐅᑎᑦᓯᓯᓐᓈᑦ, ᑐᓵᔭᒃᓴᑦ ᑐᓴᖅᑕᐅᑎᑦᓯᕙᒃᑐᖅ ᐅᖃᐅᓯᖃᑎᒌᓗᐊᓐᖏᔾᔪᑕᐅᔪᓂᒃ ᓄᓇᕗᒥ. “ᓄᓇᕗᑦ ᐊᖏᔪᐊᓘᑎᓪᓗᒍ, ᓱᓕ ᑐᓴᕐᕕᖃᕐᐸᒃᑐᒍᑦ ᖁᑦᓯᒃᑐᒥᐅᓂᒃ ᓲᕐᓗ ᐊᐅᔪᐃᑦᑐᕐᒥᐅᓂᒃ, ᖃᐅᓱᐃᑦᑐᕐᒥᐅᓂᒃ, ᑰᒑᕐᔪᒻᒥᐅᓄᑦ,” ᐃᐊᑯᓪᔅ ᐅᖃᕐᑐᖅ. “ᑐᓴᕐᕕᖃᖅᐸᒃᑐᖓ ᓄᓇᓕᓐᓂᑦ ᐅᐸᓚᐅᖅᓯᒪᓐᖏᑕᒃᑲᓂᒃ.”
ᑕᒪᓐᓇ ᐱᔾᔪᑎᒋᖃᑕᐅᓯᒪᔭᖓ ᐃᐊᑯᓪᔅ ᓈᓚᐅᓯᕆᔨᓐᖑᓚᐅᖅᓯᒪᓂᕐᒥᓄᑦ − ᑭᓯᐊᓂ ᐱᒻᒪᕆᐅᓂᖅᓴᐅᑎᓪᓗᒍ ᐅᖃᐅᓯᕐᒥᓂᒃ ᐊᑐᕈᓐᓇᓚᐅᕋᒥ ᓈᓚᐅᓯᕆᓂᒃᑯᑦ.
ᓇᒧᓐᖓᓗᐊᖅᐸᓚᐅᓐᖏᑦᑐᖅ ᓈᓚᐅᑎᖃᓐᖏᓪᓗᓂ ᒪᒃᑯᒃᑑᓪᓗᓂ. ᐱᓕᕆᐊᖅᑖᕆᐊᓐᖓᓚᐅᖅᓯᒪᔪᖅ ᓰᐱᓰᒃᑯᓐᓂ 21−ᓂᒃ ᐅᑭᐅᖃᕐᓱᓂ ᑲᖏᖅᖠᓂᕐᒥ. ᖁᕕᐊᒋᓚᐅᖅᑕᖓ ᐱᕙᓪᓕᐊᔪᓂᒃ ᑕᒡᕙᑦᓴᐃᓐᓇᖅ ᐅᖃᐅᓯᖃᕈᓐᓇᕋᒥ ᑐᓴᖅᑎᑦᓯᒋᐊᕐᓗᓂ ᓈᓚᐅᑎᒃᑯᑦ.
8 ᐅᑭᐅᖑᓚᐅᕐᑐᑦ, ᐊᓯᐊᓂᒃ ᐱᓕᕆᐊᖅᑖᓚᐅᖅᓯᒪᔪᖅ ᐊᔾᔨᒋᓐᖏᒻᒪᕆᒃᑕᖓᓂᒃ ᐅᔭᕋᕐᓂᐊᕐᑐᓕᕆᔨᒃᑯᓐᓄᑦ Agnico Eagle−ᑯᓐᓄᑦ, ᑭᓯᐊᓂ ᓈᓚᐅᑎᓄᑦ ᓄᒃᓱᒃᑕᐅᓕᓚᐅᕐᒥᔪᖅ. ᐃᐊᑯᓪᔅ ᐅᑎᓚᐅᖅᑐᖅ ᓰᐱᓰᒃᑯᓐᓄᑦ 2018−ᒥ. ᐃᓄᒃᑎᑐᑦ ᐱᕙᓪᓕᐊᔪᓕᕆᔨᐅᒍᒪᓕᓚᐅᕐᒥᒐᒥ ᐊᓈᓇᓂ ᐱᔾᔪᑎᒋᓪᓗᓂᐅᒃ.