November 10, 2019
ᓰᐱᓰᒃᑯᑦ ᐊᔾᔨᒌᖏᑦᑐᓂᒃ ᐅᓂᒃᑳᓕᐅᕐᑎᑦᓯᕙᓪᓕᐊᓯᒪᔪᑦ ᐃᓕᑕᕆᔭᐅᓯᒪᖁᓪᓗᒋᑦ ᓄᓇᓕᕐᔪᐊᖑᖃᑎᒌᑦ ᑲᑐᔾᔨᖃᑎᒌᖓᑦ ᐃᓕᑕᖅᓯᓂᖃᓚᐅᖅᑎᓪᓗᒋᑦ ᐅᑭᐅᖅ 2019 ᐅᑭᐅᕆᔭᐅᖁᓪᓗᒍ ᐃᓕᑕᕆᔭᐅᓯᒪᓗᑎᒃ ᓯᓚᕐᔪᐊᓕᒫᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ.
ᐅᔾᔨᕈᓲᑕᐅᕙᓪᓕᐊᒋᐊᖃᕐᓯᒪᔪᖅ ᐅᖃᐅᓯᑐᖃᕆᔭᐅᓯᒪᔪᑦ ᐊᓯᐅᕙᓪᓕᐊᓯᒪᓂᖏᓐᓄᑦ, ᓴᖅᑭᑎᑦᓯᒍᒪᓪᓗᑎᓪᓗ ᐅᖃᐅᓰᑦ, ᐱᕙᓪᓕᐊᓃᑦ ᐋᖅᑭᐅᒪᖃᑎᒌᑦᓯᐊᕐᓂᕐᓗ ᐊᑐᓕᖅᑎᑕᐅᕚᓪᓕᖁᓪᓗᒍ.
ᖃᐅᔨᓵᖅ ᐋᕐᓗᖅᑐᖅ “ᖃᓄᓕᒫᑲᓴᒃ ᐱᓕᕆᓯᒪᔪᖅ” ᓰᐱᓰᒃᑯᓐᓄᐊᓚᐅᕋᓂ, ᑭᓯᐊᓂ ᓱᓕ ᐃᓕᑉᐸᓪᓕᐊᖏᓐᓇᕐᓂᕋᕐᑐᖅ ᐱᓕᕆᐊᕐᒥᒍᑦ. ᓂᐱᐊ ᑐᓵᔭᐅᕙᒃᑐᖅ ᓄᓇᕗᒥ ᓄᓇᕕᒻᒥᓗ ᖃᐅᑕᒫᑦ ᐱᓇᓱᐊᕈᓯᓕᒫᖅ ᐅᑭᐅᓄᑦ ᖁᓕᓄᑦ−ᐅᓪᓛᒃᑯᑦ ᐃᓄᒃᑎᑐᑦ ᐅᖃᓕᒫᖅᑎᐅᕙᒻᒪᑦ ᐱᕙᓪᓕᐊᓯᒪᔪᓂᒃ.
“ᑕᒪᓐᓇ ᐱᓕᕆᐊᕋ ᐃᑲᔫᑎᖃᑦᓯᐊᕐᑐᖅ ᐅᕙᓐᓄᑦ ᐃᓄᒃᑎᑐᑦ ᐅᖃᓕᒪᑦᓯᐊᕈᓐᓇᕐᓂᖅᓴᐅᓯᒪᒐᒪ,” ᐋᕐᓗᖅᑐᖅ ᐅᖃᖅᑐᖅ.
“ᐊᒥᓲᒻᒪᑕ ᓱᓕ ᐅᓂᒃᑳᒃᓴᑦ ᐅᖃᐅᓯᐅᓯᒪᓐᖏᑦᑐᑦ ᑕᖅᑳᓂ.”
ᐋᕐᓗᖅᑐᖅ, 53−ᓂᒃ ᐅᑭᐅᓕᒃ, ᐅᓪᓛᖅᓯᐅᑎᐅᓗᐊᖅᓯᒪᓐᖏᒻᒥᔪᖅ, ᐱᕙᓪᓕᐊᔪᓕᕆᔨᐅᓗᓂ, ᐃᓄᒃᑎᑑᖅᓯᑎᐅᓐᖏᓪᓗᓂᓘᓐᓃᑦ.
ᐊᑦᑕᖅᑎᐅᒋᐊᓐᖓᖅᓯᒪᔪᖅ ᓄᓇᑐᖃᕐᒥᓂ ᑭᒻᒥᕈᕐᒥ, ᐊᔪᒐᓚᓚᐅᖅᓯᒪᓂᕋᕐᑐᖅ ᐅᓪᓛᕈᖃᑦᑕᕆᐊᒃᓴᖅ 8−ᒥ ᐅᓪᓛᒃᑯᑦ ᐱᒋᐊᕆᐊᖃᖃᑦᑕᓚᐅᖅᓯᒪᒐᒥ; ᒫᓐᓇᓕ ᐃᖅᑲᓇᐃᔭᕐᕕᒥᓃᖃᑦᑕᓕᕐᑐᖅ 6−ᒥ ᐅᓪᓛᒃᑯᑦ ᐅᓪᓛᑕᒫᑦ.
ᐊᑦᑕᖅᑎᐅᖃᑦᑕᓚᐅᖅᓱᓂ ᒪᐃᔭᕈᕐᓂᑯ ᑭᒻᒥᕈᕐᒧᑦ, ᐃᓄᓕᕆᔨᐅᓯᒪᓪᓗᓂ, ᓴᓇᓐᖑᐊᖅᑎᐅᓯᒪᓪᓗᓂᐅᔭᒥᓕᐅᖅᑎᐅᓪᓗᓂᓗ−ᑕᒪᕐᒥᒃ ᐃᑲᔫᑎᖃᖅᓯᒪᓂᕋᕐᑕᖏᑦ ᖃᓄᐃᑦᑐᑐᐃᓐᓇᕐᓂᒃ ᐅᓂᒃᑳᖃᖃᑦᑕᕐᓂᐊᕐᓂᕋᒥ ᓈᓚᐅᑎᒃᑯᑦ.
ᓯᕗᓪᓕᖅᐹᒥᒃ ᐅᖃᓕᒫᕆᐊᓐᖓᕐᓂᐊᕐᓱᓂ ᐱᕙᓪᓕᐊᔪᓂᒃ −13−ᑲᓴᐅᓕᖅᑐᑦ ᐅᑭᐅᑦ −ᐃᑲᕐᕋᐅᑉ ᓇᑉᐸᐃᓐᓇᖓᓂᑦ ᐊᑐᐃᓐᓇᕈᖅᑎᒋᐊᖃᓚᐅᖅᓯᒪᓂᕋᕐᑐᖅ.
ᐃᓕᓐᓂᐊᖅᑎᐅᓚᐅᖅᓯᒪᔪᖅ ᓄᓇᕗᑦ ᓯᓚᑐᓴᕐᕕᐊᓂ, ᐱᔭᕆᐅᖅᓴᖅᑎᑕᐅᓪᓗᓂ ᓰᐱᓰᒃᑯᓐᓂ ᑲᑎᖅᓱᐃᑎᑕᐅᓪᓗᓂ ᐃᓄᒃᑎᑐᑦ ᐊᐱᖅᓱᕐᓂᕆᔭᐅᖃᑦᑕᖅᓯᒪᔪᕕᓂᕐᓂᒃ, ᐃᓇᖐᑲᐃᓐᓇᖁᔭᐅᓚᐅᖅᓯᒪᔪᖅ−ᖃᓪᓗᓈᑎᑐᑦ ᐱᕙᓪᓕᐊᔪᓂᒃ ᐃᓄᒃᑎᑑᓕᖅᓯᖁᔭᐅᓪᓗᓂ ᓈᓚᐅᑎᒃᑯᑦ.
ᐊᕐᕌᒍᖅᑎᓪᓗᒍ, ᐃᖅᑲᓇᐃᔮᕆᓪᓚᕆᓕᓚᐅᖅᑕᖓ ᐅᓪᓗᓕᒫᖅᑕᓕᕐᓱᓂ.
ᐅᖃᐅᓯᖃᑎᒌᖏᓐᓃᑦ
ᓰᐱᓰᒃᑯᓐᓂ ᐅᖃᕈᓐᓇᖅᓯᓚᐅᕐᑐᖅ ᐅᖃᐅᓯᑐᖃᕆᓐᖏᑕᒥᓂᒃ ᓄᓇᕗᒥ ᐊᒥᓱᑦ ᐅᖃᐅᓯᖃᑎᒌᓪᓚᕆᓐᖏᒻᒪᑕ. ᐊᑐᕐᓱᓂ ᐃᓅᑉ ᐊᑎᕈᓯᐊᓂᒃ ᓄᓇᖓᓂᓪᓗ, ᐋᕐᓗᖅᑐᖅ ᐅᖃᐅᓯᑐᖃᕆᓐᖏᑕᒥᓂᒃ ᐊᑐᕋᓱᒃᐸᒃᑐᖅ ᐅᖃᐅᓯᖃᓕᕋᐃᒐᒥ ᓄᓇᓖᑦ ᐊᔾᔨᒌᖏᑦᑐᑦ ᒥᒃᓵᓄᑦ, ᐃᓚᖏᑦ ᐅᖃᐅᓰᑦ ᑕᐃᒫᑦᓴᐃᓐᓇᖅ ᑐᑭᖃᖅᑎᑕᐅᕙᓐᖏᒻᒪᑕ ᓄᓇᓕᓐᓂ ᐊᔾᔨᒌᖏᑦᑐᓂ.
“ᐅᓂᒃᑳᕆᒻᒪᒋᑦ, ᐅᖃᐅᓯᑐᖃᖏᓐᓂᒃ ᐊᑐᕋᓱᒃᐸᒃᑐᖓ ᑐᑭᓯᔭᐅᑦᓯᐊᖁᕙᒃᑲᒃᑭᑦ ᐅᖃᐅᓯᕆᒐᓱᑦᑕᒃᑲ,” ᐊᕐᓗᖅᑐᖅ ᐅᖃᖅᑐᖅ.
ᑕᐃᒫᑦᑕᐅᖅ ᐃᓕᓴᐃᒐᓱᖃᑦᑕᕐᒥᔪᖅ ᐃᓄᒃᑎᑐᑦ 8−ᓄᑦ ᕿᑐᕐᖓᒥᓄᑦ. ᐊᖏᔪᖅᓯᖅᐹᖁᑎᐊ 33−ᓂᒃ ᐅᑭᐅᖃᕐᑐᖅ ᓄᑲᖅᓯᖅᐹᖁᑎᐊ 13-ᓂᒃ ᐅᑭᐅᖃᕐᑎᓪᓗᒍ, ᐊᑖᑕᑦᓯᐊᖑᓕᕐᓱᓂᓗ.
ᐊᒃᓱᕈᕐᓇᒐᓚᓐᓂᖃᕐᑐᖅ ᐃᓄᒃᑎᑐᑦ ᐃᓕᓴᐃᒐᓱᒋᐊᒃᓴᖅ ᐅᓪᓗᒥ ᑭᖑᕚᕆᔭᐅᓕᕐᑐᓂᒃ.
ᐅᖃᕐᓱᓂᖃᓪᓗᓇᐅᔭᕐᓂᖅ ᑐᑭᓯᓇᑲᐅᑎᒋᓲᖑᓂᖓᓂᒃ ᐱᔭᕆᐊᑭᓐᓂᖅᓴᐅᓪᓗᓂᓗ, ᐃᓄᒃᑎᑐᓪᓕ ᐅᖃᐅᓯᖅ ᐱᔭᕆᐊᑐᓂᖅᓴᐅᒻᒪᑦ ᐃᓕᖅᑯᓯᕆᔭᐅᔪᓄᓪᓗ ᐊᑕᓪᓗᓂ ᑐᑭᓯᓇᕐᓂᐊᕐᐸᑦ − ᐃᓱᒫᓘᑎᖃᕐᑐᖅ ᕿᑐᕐᖓᖏᑦ ᐱᕈᖅᓴᓕᕐᓂᖏᓐᓂᑦ ᐊᔾᔨᐅᖏᑦᑐᒥᒃ ᐃᓕᖅᑯᓯᖃᓕᖅᐸᓪᓕᐊᓪᓗᑎᒃ. ᐃᖃᓗᓐᓂ, ᐃᓄᐃᑦ ᖃᓪᓗᓇᐅᔭᕐᓂᖅᓴᐅᒻᒪᑕ ᑭᒻᒥᕈᕐᒥᐅᓂᑦ.
“ᖃᐅᔨᓯᒪᔪᖓ ᓄᑕᖅᑲᑦ ᐅᓪᓗᒥᐅᓕᕐᑐᖅ ᖃᓪᓗᓇᐅᔭᕐᓂᖅᓴᐅᓕᕐᒪᑕ, ᐃᓄᐃᓪᓖᓛᒃ ᓄᑕᖅᑲᖏᑦ, ᐅᖃᐅᓯᖃᑎᒌᓗᐊᓐᖏᓐᓂᖏᑦ ᐱᔾᔪᑕᐅᓪᓗᑎᒃ,” ᑕᐃᒫᒃ ᐅᖃᕐᑐᖅ.
ᕿᑐᕐᖓᖏᑦ ᐃᓕᓐᓂᐊᕐᓯᒪᔪᑦ ᐃᖃᓗᓐᓂ ᐃᓄᒃᑎᑐᑦ ᐃᓕᓴᐃᔨᖃᕐᓯᒪᓪᓗᑎᒃ ᐅᖃᐅᓯᖃᑎᒌᓗᐊᓐᖏᑦᑐᓂᒃ.
“ᑕᒻᒪᕈᑎᖃᖅᓯᒪᔪᖓ ᐃᓕᓐᓂᐊᕌᓂᒐᐃᒻᒪᑕ ᐅᖃᐅᓯᕆᓐᖏᑕᑦᑎᓐᓂᒃ ᐊᑐᓕᖃᑦᑕᔪᒻᒪᑕ ᐃᓄᒃᑎᑐᑦ. ᐱᑦᓯᐊᔪᓴᕐᓗᖓ ᐅᖃᐅᑎᒋᐊᖃᑦᑕᖏᖔᕐᓱᒋᑦ... ᐅᖃᐅᑎᖃᑦᑕᔪᒐᒃᑭᑦ ᑕᐃᒫᖑᓐᖏᑦᑐᖅ ᐅᖃᕐᓂᕋᖅᓱᒋᑦ. ᐃᒫᖔᖅ ᐅᖃᕆᐊᖃᖅᑐᑏᓚᕙᔪᒐᒃᑭᑦ.” ᓱᓇᐅᕝᕙᓕ ᖃᖃᑦᑕᕈᒪᒍᓐᓃᖅᑎᖔᕐᓂᕐᓱᒋᑦ ᐃᓄᒃᑎᑐᑦ.”
ᑕᒪᑐᒥᖓ ᐊᓯᔾᔩᒐᓱᐊᕐᓂᕋᓕᖅᑐᖅ. ᖃᓪᓗᓇᐅᔭᓐᖏᓐᓂᖅᓴᐅᒐᓱᖃᑦᑕᓕᕐᑐᖅ ᐱᔭᕆᐊᑭᓐᓂᖅᓴᐅᒐᓗᐊᖅᑎᓪᓗᒍ ᐅᖃᕆᐊᖓ, ᐃᓄᒃᑎᑑᕐᓂᖅᓴᐅᒐᓱᖃᑦᑕᓕᕐᓱᓂ ᐅᖃᓪᓚᓕᕋᐃᒐᒥ.
ᓇᓕᒧᒌᒃᑎᑦᓯᒐᓱᓐᓂᖅ ᐃᓕᖅᑯᓯᕐᒥᒃ ᐃᖅᑲᓇᐃᔮᒥᓂᓪᓗ
ᐋᕐᓗᖅᑐᖅ ᐱᓕᕆᓪᓗᓂ ᐊᑲᐅᓗᐊᓐᖏᑦᑐᒃᑰᖃᑦᑕᕐᓯᒪᔪᖅ ᐱᔾᔪᑎᖃᕐᓱᓂ ᐃᓕᖅᑯᓯᕐᒥᓂᒃ ᐃᓄᖁᑎᒥᓂᓪᓗ.
“ᐅᑭᐅᓂ ᐊᓂᒍᖅᓯᒪᔪᓂ, ᐱᖃᓐᓇᕆᔭᒃᑲᓂᒃ ᐊᓐᓇᐃᖃᑦᑕᖅᓯᒪᔪᖓ ᐱᕙᓪᓕᐊᔪᑎᒎᕈᔾᔭᐅᒋᐊᖃᖅᓯᒪᒐᐃᒻᒪᑕ ᐅᕙᖓᓗ ᐅᖃᐅᓯᕆᒋᐊᖃᕐᓱᒋᑦ ᐱᕙᓪᓕᐊᔪᑎᒍᑦ,” ᐃᓕᖅᑯᓯᑐᖃᖅᑎᒍᑦ ᐃᒻᒥᒨᓕᖓᓗᐊᕐᑐᓂᒃ ᑲᓐᖑᓇᒐᓚᑦᑐᓂᓪᓗ ᐊᐱᖅᑯᑎᖃᓗᐊᖃᑦᑕᖅᓯᒪᒐᓂ ᐊᐱᖅᓱᕆᐊᖃᓕᕐᓱᓂ ᐊᔪᕐᓇᒐᓚᒻᒥᔪᖅ.
ᑭᓯᐊᓂᑦᑕᐅᖅ ᖃᓂᒋᓕᖅᐹᓪᓕᕈᑎᒋᓐᓇᕐᒥᔪᖅ ᐊᐱᖅᓱᖃᑦᑕᕐᓗᓂ. “ᐅᖃᓪᓚᖃᑦᑕᕆᐊᒃᓴᖅ ᐱᐅᒋᔭᕋ, ᐱᓗᐊᖅᑐᒥᒃ ᐃᓐᓇᑐᖃᕐᓂᖅ ᐅᖃᖃᑎᖃᕐᓗᓂ ᖁᕕᐊᓇᕐᑐᖅ, ᐃᓐᓇᐅᓂᖅᓴᐅᓕᕋᒪᑦᑕᐅᖅ, ᐅᖃᐅᓯᕋᓂᒃ ᖃᐅᔨᒪᔭᒃᑲᓂᓪᓗ ᑐᓐᓂᐅᑎᖃᕆᐊᖃᕐᒥᒐᒪ ᕿᑐᕐᖓᒃᑲᓄᑦ,” ᐋᕐᓗᖅᑐᖅ ᑕᐃᒫᒃ ᐅᖃᕐᑐᖅ.
ᐃᖅᑲᓇᐃᔭᖅᑎᑐᖃᐅᓕᕐᓱᓂ ᐃᖃᓗᐃᑦ ᐱᕙᓪᓕᐊᔪᓕᕆᔨᒃᑯᖏᓐᓄᑦ, ᐊᖅᑯᑎᒋᔭᐅᓕᖅᐸᒻᒥᔪᖅ − ᖃᓪᓗᓈᓄᑦ ᐃᖅᑲᓇᐃᔭᖃᑎᒥᓄᑦ ᑐᑭᓯᔭᐅᑎᑦᓯᒐᓱᐊᕐᓱᓂ ᐃᓄᐃᑦ ᐃᓕᖅᑯᓯᖏᓐᓂᑦ, ᐊᒻᒪᓗ ᑲᓇᑕᒥᓯᓚᕐᔪᐊᕐᒥᓗ ᐱᕙᓪᓕᐊᔪᓂᒃ ᐅᓂᒃᑳᖃᕋᓱᓕᕋᐃᒐᒥ ᐃᓄᓐᓄᑦ ᓈᓚᒃᐸᒃᑐᓄᑦ.
ᑕᑯᒃᓴᐅᒐᔪᒻᒥᔪᖅ ᐃᒐᓛᒃᑯᑎᒍᑦ, ᓰᐱᓰᒃᑯᑦ ᐅᓐᓄᕈᒥᑕᕐᓇᐅᑎᓪᓗᒍ ᐃᓄᒃᑎᑐᑦ ᐱᕙᓪᓕᐊᓯᒪᔪᓂᒃ ᐅᖃᐅᓯᖃᕐᓱᓂ, ᑐᓴᕆᐊᖅᑎᑦᓯᔨᐅᕙᒻᒪᑦ ᓯᓚᕐᔪᐊᕐᒥ ᐱᕙᓪᓕᐊᓯᒪᔪᓂᒃ.
ᐋᕐᓗᖅᑐᖅ ᐱᕙᓪᓕᐊᓯᒪᔪᓂᒃ ᖃᐅᔨᒐᓱᐃᓐᓇᓲᖅ − ᓈᓚᒐᓱᐃᓐᓇᖅᐸᒃᑐᖅ ᓯᓚᕐᔪᐊᕐᒥ ᐱᕙᓪᓕᐊᔪᓂᒃ ᕿᓂᕋᓱᐊᕐᓱᓂ ᑐᓴᕈᒥᓇᕆᔭᐅᒐᔭᕐᑐᓂᒃ ᐃᓄᓐᓄᑦ ᓈᓚᒃᐸᒃᑐᓄᑦ. ᑕᑯᒃᓴᐅᑎᑦᓯᓂᐊᓕᕋᐃᒐᒥ, ᐃᓱᒪᒋᔭᖃᐃᓐᓇᓲᖅ ᐃᓄᓐᓂᒃ ᓈᓚᓚᖓᔪᓂᒃ − ᐅᓂᒃᑳᕆᓂᐊᖅᑕᖓ ᑕᑯᒃᓴᐅᑎᑕᐅᑎᓪᓗᒍ ᖃᓪᓗᓈᑎᑐᑦ ᐅᓪᓗᓕᒫᖅ ᐃᑲᕐᕋᓄᑦ 24-ᓄᑦ, ᓯᕗᓪᓕᖅᐹᒥᒃ ᐃᓄᒃᑎᑐᑦ ᐅᖃᐅᓯᐅᓚᖓᑎᓪᓗᒍ ᐃᓱᒪᒋᓗᐊᖅᐸᒃᑕᖓ.
“ᑎᓕᐅᕆᒋᐊᕈᒪᔪᖓ ᐃᓅᖃᑎᒃᑲᓂᒃ ᐅᓂᒃᑳᖅᑎᓐᖑᖅᐸᓪᓕᐊᖁᓪᓗᒋᑦ ᓈᓚᓐᓂᖅᓴᐅᖃᑦᑕᕐᓗᑎᓪᓘᓐᓃᑦ ᐅᓂᒃᑳᕆᔭᐅᔪᓂᒃ. ᖁᕕᐊᓇᕈᓐᓇᕐᒪᑦ...ᐊᒻᒪᓗ ᑐᓴᕈᒥᓇᖃᑦᑕᕐᓱᑎᒃ.”