September 15, 2019
ᓰᐱᓰᒃᑯᑦ ᐊᔾᔨᒌᖏᑦᑐᓂᒃ ᐅᓂᒃᑳᓕᐅᕐᑎᑦᓯᕙᓪᓕᐊᓯᒪᔪᑦ ᐃᓕᑕᕆᔭᐅᓯᒪᖁᓪᓗᒋᑦ ᓄᓇᓕᕐᔪᐊᖑᖃᑎᒌᑦ ᑲᑐᔾᔨᖃᑎᒌᖓᑦ ᐃᓕᑕᖅᓯᓂᖃᓚᐅᖅᑎᓪᓗᒋᑦ ᐅᑭᐅᖅ 2019 ᐅᑭᐅᕆᔭᐅᖁᓪᓗᒍ ᐃᓕᑕᕆᔭᐅᓯᒪᓗᑎᒃ ᓯᓚᕐᔪᐊᓕᒫᒥ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑦ.
ᐅᔾᔨᕈᓲᑕᐅᕙᓪᓕᐊᒋᐊᖃᕐᓯᒪᔪᖅ ᐅᖃᐅᓯᑐᖃᕆᔭᐅᓯᒪᔪᑦ ᐊᓯᐅᕙᓪᓕᐊᓯᒪᓂᖏᓐᓄᑦ, ᓴᖅᑭᑎᑦᓯᒍᒪᓪᓗᑎᓪᓗ ᐅᖃᐅᓰᑦ, ᐱᕙᓪᓕᐊᓃᑦ ᐋᖅᑭᐅᒪᖃᑎᒌᑦᓯᐊᕐᓂᕐᓗ ᐊᑐᓕᖅᑎᑕᐅᕚᓪᓕᖁᓪᓗᒍ.
ᖃᕙᕙᐅᖅ ᐲᑕ ᓰᐱᓰᒃᑯᓐᓂ ᓄᓇᕗᒥ ᐅᓪᓛᒃᑯᑦ ᓈᓚᐅᓯᕆᕙᒃᑐᖅ ᖁᓪᓕᕐᒥᑦ, ᒪᕐᕈᐃᓕᖓᔪᒥᑦ ᐃᓅᓯᖃᕐᓱᓂ. ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᑭᓐᖓᕐᓂ, ᐲᑕ ᒫᓐᓇ ᓄᓇᖃᓕᕐᑐᖅ − ᓈᓚᐅᓯᕆᕙᒃᓱᓂᓗ − ᐊᖏᔪᖅᑳᒃᑯᕕᒻᒥ ᐃᖃᓗᓐᓂ.
ᐊᑯᓂ ᐅᖃᖅᑎᒋᔭᐅᓕᕐᑐᖅ, ᐊᔾᔨᒌᖏᑦᑐᓂᒃ ᐱᓕᕆᐊᖃᕐᓯᒪᔪᖅ ᓲᕐᓗ ᐃᓄᐃᑦ ᑕᑯᓐᓇᕋᒃᓴᓕᕆᔨᒃᑯᖏᓐᓂ ᐊᒻᒪ ᓰᐱᓰᒃᑯᓐᓂ ᐊᒻᒪᓗ ᐅᖁᒪᐃᑦᑐᓂᒃ ᓄᓇᓯᐅᓯᕆᔨᐅᓯᒪᓪᓗᓂ.
ᐊᒻᒪᓗ, ᐊᔾᔨᒋᔭᐅᓗᐊᓐᖏᒻᒥᔪᖅ ᓰᐱᓰᒃᑯᑦ ᓄᓇᖃᖅᑳᖅᓯᒪᔪᑦ ᐅᖃᐅᓯᖏᑎᒍᑦ ᐅᖃᖅᑎᐅᕙᒃᑐᓄᑦ, ᒪᕐᕈᐃᓕᖓᔪᒥᑦ ᐅᖃᐅᓯᖃᖃᑦᑕᕐᒪᑦ: ᐃᑲᕐᕋᐅᑉ ᓇᑉᐸᖓᓂ ᖃᓪᓗᓈᑎᑐᑦ ᐅᖃᖅᑎᐅᕙᒻᒪᑦ ᐊᒻᒪᓗ ᐱᖃᑖᓂ ᐃᑲᕐᕋᐅᑉ ᓇᑉᐸᖓᓂ, ᐃᓄᒃᑎᑑᓕᖃᑦᑕᕐᓱᓂ.
“ᐊᒃᓱᕈᕐᓇᒐᓚᖃᑦᑕᕐᓯᒪᓂᕋᐃᔪᖅ” ᐅᑎᖅᑕᕆᐊᖃᕐᓱᓂ ᖃᓪᓗᓈᑎᑐᑦ ᐃᓄᒃᑎᑐᓪᓗ. “ᐱᒋᐊᓕᕋᑖᖅᓱᖓ, ᐊᒃᓱᕈᕐᓇᒻᒪᕆᓚᐅᖅᓯᒪᔪᖅ...ᑭᖑᓂᐊᒍᑦ ᓱᖏᐅᑎᔾᔫᒥᒐᒃᑯ, ᖃᓄᐃᒋᒍᓐᓃᓚᐅᖅᑕᕋ.”
ᑭᓐᖓᕐᓂᑦ ᓰᐱᓰᒃᑯᓐᓄᑦ
ᑭᓐᖓᕐᓃᑦᓱᓂᓱᓕ ᐊᖅᑯᓯᐅᖅᓯᒪᔫᔮᕐᑐᖅ ᓰᐱᓰᒃᑯᓐᓅᕈᑎᒋᓯᒪᓪᓗᓂᐅᒃ ᐲᑕᐅᑉ. ᐃᖅᑲᓇᐃᔭᕐᓱᓂ ᕼᐊᒻᓚᒃᑯᓐᓄᑦ ᐃᒥᖅᑕᖅᑎᓄᑦ ᐊᖁᑎᒋᔭᐅᓪᓗᓂ, ᐅᖃᖅᑎᐅᖃᑕᐅᒋᐊᓕᖅᓯᒪᔪᖅ ᓈᓚᐅᓯᕆᔨᐅᑲᐃᓐᓇᖃᑦᑕᕐᓱᓂ ᑭᓐᖓᐃᑦ ᑐᓴᐅᑎᖓᑦᑎᒍᑦ.
ᑕᐃᑲᓃᓱᓂ, ᑐᓴᒐᒃᓴᓕᕆᖃᑦᑕᓚᐅᕐᑐᖅ ᐃᓄᒃᑎᑐᑦ ᖃᓪᓗᓈᑎᑐᓪᓗ, ᐃᑲᔫᑎᖃᕐᓯᒪᔪᖅ ᑕᒪᓐᓇ ᓂᐱᒋᔭᐅᓕᕐᑎᓪᓗᒍ ᓄᓇᕗᒥ ᐊᒥᓱᓂᓪᓗ ᓈᓚᒃᑎᖃᕐᓱᓂ. ᐱᓕᕆᖃᑕᐅᖃᑦᑕᕐᓯᒪᓪᓗᓂ ᐃᓄᐃᑦ ᑐᓴᒐᒃᓴᓕᕆᔨᒃᑯᖏᓐᓄᑦ ᐅᖃᖅᑎᒋᔭᐅᓪᓗᓂ ᐃᓅᔭᓐᖑᐊᓕᕆᔨᐅᓯᒪᓪᓗᓂᓗ ᓄᑕᖅᑲᓄᑦ ᑕᕐᕆᔭᐅᑎᒋᔭᐅᔪᒥ − “ᖁᕕᐊᓇᕆᓚᐅᖅᑕᕋ,” − ᐲᑕ ᐅᑎᓕᓚᐅᖅᓯᒪᒻᒥᔪᖅ ᑭᓐᖓᕐᓄᑦ ᐃᖅᑲᓇᐃᔮᖃᓕᕐᓱᓂ ᐅᖁᒪᐃᑦᑐᓂᒃ ᓄᓇᓯᐅᓯᕆᓂᕐᒥᒃ.
ᐱᖓᓲᔪᕐᑐᑦ ᐅᑭᐅᑦ ᓈᑎᓪᓗᒋᑦ, ᓰᐱᓰᒃᑯᑦ ᐃᖃᓗᓐᓂ ᑐᒃᓯᕋᓕᕐᒪᑕ ᑐᓴᐅᒪᔭᐅᔪᒃᓴᓕᕆᔨᒃᑯᓐᓄᑦ ᐊᐅᓚᑦᓯᔨᐅᒐᔭᕐᑐᒥᒃ, ᐱᓇᓱᐊᖃᑕᐅᓚᐅᖅᓯᒪᒐᒥ ᐃᖅᑲᓇᐃᔭᖅᑎᑖᕆᔭᐅᓕᓚᐅᖅᓯᒪᔪᖅ, ᑕᕝᕙᓐᖓᑦᓴᐃᓐᓇᖅ.
ᑭᖑᓂᐊᒍᑦ, ᐅᖃᖅᑎᒋᔭᐅᓕᓚᐅᕐᑐᖅ ᐅᓪᓗᕈᒥᑕᕐᓇᒥ ᓈᓚᐅᓯᕆᔨᓄᑦ ᐊᒻᒪᓗ ᖁᓪᓕᒃᑯᓐᓅᓕᕆᓪᓗᓂ, ᐱᖓᓱᓄᑦ ᐅᑭᐅᓄᑦ ᑕᐃᑲᓃᓕᕐᑐᖅ. ᐲᑕ ᐃᓚᒥᓂᒃ ᓅᖃᑎᖃᕋᒥ ᐃᖃᓗᓐᓄᑦ, ᐱᓕᕆᐊᕐᒥᓂᒃ ᐱᒻᒪᕆᐅᒍᓱᓕᓚᐅᖅᑐᖅ.
ᐅᖃᕐᓱᓂ ᐃᖃᓗᓐᓂ, ᐊᒥᓲᖏᑦᑐᒻᒪᕆᐅᓕᕐᓂᖏᓐᓂᑦ ᒪᒃᑯᒃᑐᑦ ᐅᖃᕈᓐᓇᑦᓯᐊᕐᑐᑦ ᐃᓄᒃᑎᑐᑦ ᐅᖃᐅᓯᑐᖃᕐᒥᓂᒃ ᓲᕐᓗᓕ ᐊᓯᖏᓐᓂ ᓄᓇᓕᐊᓛᖑᓂᖅᓴᓂ ᓱᓕ ᐃᓄᒃᑎᑑᑦᓯᐊᕐᓂᖅᓴᐅᒐᓗᐊᖅᑎᓪᓗᒋᑦ, ᐱᖅᑯᓯᑐᖃᕐᓂᓪᓗ ᐊᑐᕐᓂᖅᓴᐅᔫᔮᕐᓱᑎᒃ.
“ᐊᒥᓲᓗᐊᓐᖏᒻᒪᑕ ᐃᓄᒃᑎᑑᕈᓐᓇᑦᓯᐊᕐᑐᑦ ᓄᓇᓕᕐᔪᐊᕐᒥ, ᐱᓗᐊᕐᑐᒥᒃ,” ᐅᖃᓚᐅᕐᑐᖅ “ᐅᖃᖅᑎᒋᔭᐅᓂᕐᒥᒍᑦ ᐃᑲᔫᑎᖃᖅᐹᓪᓕᒐᔭᕐᓂᖓᓂᒃ ᐅᖃᓪᓚᖃᑦᑕᕈᓂ ᐃᓄᒃᑎᑐᑦ ᐅᖃᐅᓯᑐᖃᕆᔭᐅᔪᕐᓗ ᐅᑎᖅᐹᓪᓕᕋᔭᕐᓂᖓᓂᒃ ᓂᕆᐅᓐᓂᖃᕐᓱᓂ.
“ᑕᑯᕙᓪᓕᐊᖃᑦᑕᕐᓯᒪᔪᖓ ᐃᓚᒃᑲ, ᖃᑕᓐᖑᑎᑦᓴᒃᑲᓗ ᐃᖃᓗᓐᓃᑦᑐᑦ ᐊᓯᐅᔨᕙᓪᓕᐊᓕᕐᓂᖏᓐᓂᑦ ᐅᖃᐅᓯᑐᖃᕐᒥᓂᒃ. ᓄᑕᕋᒃᑲ ᑕᐃᒪᐃᖁᓯᒪᓐᖏᑕᒃᑲ ᐃᓄᒃᑎᑑᖏᓐᓇᖁᓇᕐᑐᑦ.”
ᓄᓇᓕᐸᐅᔭᒦᓕᕋᒥ, ᖃᕙᕙᐅᖅ ᓄᑕᖅᑲᒥᓂᒃ ᐅᖃᐅᔾᔪᐃᕙᒃᑐᖅ ᐃᓄᒃᑎᑑᕐᓂᖅ ᐱᒻᒪᕆᐅᓂᖃᖓᓂᒃ ᐅᖃᐅᓯᑐᖃᐅᑎᓪᓗᒍ, ᐅᖃᕐᓱᓂᓗ ᐃᓛᓐᓂᒃᑯᑦ ᖃᓪᓗᓇᐅᔭᓕᕋᐃᒻᒪᑕ ᑐᑭᓯᓐᖏᓐᖑᐊᖃᑦᑕᕐᓂᕋᕐᓱᓂ, ᐃᓄᒃᑎᑐᖔᖅ ᐅᖃᕈᓐᓇᕐᓂᐊᕐᒪᑕ.
‘ᑕᒪᐅᖓ ᐃᑲᔪᕆᐊᖅᓯᒪᕗᖓ’
ᐃᓄᒃᑎᑐᑦ ᐅᖃᐅᓯᕐᒥᒃ ᐅᑎᖅᑎᑦᓯᕙᓪᓕᐊᖃᑕᐅᒐᓗᐊᕐᓱᓂ, ᖁᓪᓕᕐᒥᑦ ᐊᖅᑯᑎᖃᕈᓐᓇᕐᓯᒻᒥᔪᖅ ᐅᓂᒃᑳᖃᕈᓐᓇᕐᓗᓂ ᓄᓇᒦᖃᑦᑕᕐᓂᕐᒥᑦ − ᐊᑐᓗᐊᕈᓐᓃᖅᓯᒪᔭᖓ ᑕᐃᒪᓐᖓᑦ ᓅᓚᐅᕋᒥ ᓰᐱᓰᒃᑯᓐᓂ ᐅᖃᖅᑎᒋᔭᐅᓂᐊᓕᕐᓱᓂ.
“ᑭᓐᖓᕐᓃᑦᓱᖓ ᓱᓕ, ᐱᓇᓱᐊᕈᓯᐅᑉ ᓄᓐᖑᐊᓂ ᑕᒫᑦ, ᐃᖃᓪᓕᐊᖃᑦᑕᓚᐅᖅᓯᒪᔪᖓ ᑲᖑᖅᓯᐅᖅᓱᖓᓘᓐᓃᑦ,” ᐊᒻᒪᓗ ᑕᐃᑦᓱᒪᓂ ᑐᒃᑐᓯᐅᕈᓐᓇᓚᐅᖅᓯᒪᓪᓗᑕ ᓄᓇᑦᑎᓐᓂ.”
“ᐃᖅᑲᐃᕙᒃᑐᖓ ᓄᓇᒥ ᐱᓕᕆᓂᕆᕙᓚᐅᖅᑕᒃᑲᓂᒃ, ᖃᓄᕐᓗ ᐊᓐᓇᐅᒪᒐᓱᐊᕐᓂᕐᒥᑦ, ᓱᓇᓂᓪᓗ ᐱᔭᕆᐊᖃᕐᒪᖔᕐᒪ.”
ᓂᐱᒋᔭᐅᖃᑕᐅᓕᕐᑐᖅ ᒫᓐᓇ ᓄᓇᖃᖅᑲᖅᓯᒪᔪᑦ ᐅᖃᐅᓯᖏᑦᑎᒍᑦ, ᐲᑕ ᐅᖃᐅᔾᔨᒋᐊᕈᒪᔪᖅ ᐃᓅᖃᑎᒥᓂᒃ ᐱᓕᕆᐊᕆᔭᖓᑎᑐᑦ ᐱᓕᕆᐊᖃᕈᒪᔪᓄᑦ: ᐊᓯᒥᓐᓂᒃ ᐃᑲᔪᖅᑎᖃᕋᓱᐊᖃᑦᑕᖁᓪᓗᓂᒋᑦ.
“ᐱᒋᐊᓐᖓᓕᕐᓱᓂ, ᖁᒃᓴᓱᓐᓇᖅᑑᒐᓗᐊᖅ, ᑭᓯᐊᓂ ᐃᓄᒃᑕᖃᐃᓐᓇᓲᖅ ᐃᑲᔪᕈᓐᓇᕐᑐᓂᒃ, ᐱᓗᐊᖅᑐᒥᒃ ᐅᕙᓂ ᐃᖅᑲᓇᐃᔭᕐᕕᑦᓯᐊᕙᑦᑎᓐᓂ. “ᖃᐅᔨᒪᒋᑦᓯ ᑕᕝᕙᓂ, ᐃᑲᔪᖅᑎᒃᓴᖃᐃᓐᓇᓲᖑᒻᒪᑦ. ᐃᑲᔪᖅᑕᐅᖏᓐᓇᕐᓂᐊᕐᑐᓯ ᐃᑲᔪᖅᑕᐅᔭᕆᐊᖃᓕᕋᐃᒍᑦᓯ.
ᐅᕙᖓᑦᑕᐅᖅ ᐃᑲᔪᖃᑕᐅᔪᓐᓇᕐᒥᔪᖓ. ᖃᓄᑐᐃᓐᓇᖅ ᐃᑲᔪᖅᑕᐅᔭᕆᐊᖃᕈᕕᑦ, ᐅᔨᑎᑕᐅᖃᑦᑕᕈᒪᑐᐃᓐᓇᖅᑐᖓ.”